Ang Akong Semanang Talaan (9)

Nagsagol ang akong gibati karong semanaha. Paglunes, nagklase ra kami, ug sa usa sa among mga klase, naglantugi kami bahin sa pagbuwag sa simbahan og sa gobyerno. Lingaw ang among lantugi ug nalipay ko sa mga resulta ato.

Tarong gihapon ang among klase pagmartes ug paghuman niini, nagpundok mi sa Debate Society aron maghisgot bahin sa among exhibition debate igmiyerkules para sa among Speech Fest. Nagpraktis pud mi alang niini.

Pag-abot sa Miyerkules, niadto mi una sa UP para sa Campus Journalism Forum ug didto, daghan kaayo ko og nakat-unan bahin sa mga responsibilidad sa usa ka journalist. Pag-abot namo sa among eskwelahan, nag-andam dayon mi para sa among lantugi. Nakuyawan ko kay daghan kaayo og manan-aw namo didto. Pagsugod sa among lantugi, nalingaw ko og maayo ug nalipay pud ko kay nadaog among grupo ug nakadawat ko sa Best Debater nga ganti. Dako ang akong pasalamat sa Ginoo sa pagtabang Niya kanako atong adlawa.

Nagklase mi sa Huwebes ug sa Biyernes. Nalingaw gayod ko pagbiyernes tungod among giandaman og gamay nga regalo ang among magtutudlo nga si Sir Leo Lastimosa kay adlaw sa iyang pagkatao. Amo jud siya giadto sa Parklane ug nagdala mi og cake, balloons, ug card nga naay litrato niya. Abi namog dili na siya muabot didto sa kadugay namog huwat ug dili pa jud niya tubagon ang among tawag. Dako ang among pagkahimutang nga naabot jud siya ug iyang nadawat ang among gamay nga surprise alang kaniya. Hinaot pa unta nga nalipay siya sa among gamay nga regalo ug padayunan siya og hatag og grasya sa Ginoo.

Malipayong Adlaw sa Pagkatao Sir!

Lima Ka Bag-ong Cebuanong Pulong (15)

1. Kiho- v. to jerk; a shudder the shoulder

Nikiho si Danilo kay gigitik siya ni Tomas.

2. Gaang-gaangan- adj. rocky; rugged place

Dili siya ganahan muagi dihang dapita tungod sa gaang-gaangan nga dalan.

3. Limod- v. to deny; to tell a lie

Gitudluan mi sa among ginikanan nga dili manglimod kay sayop kini.

4. Sagabay- n. friends; playmates; playfellows

Magul-anon si Inday kay wala siya'y mga sagabay.

5. Yahong- n. bowl; table bowl

Nayabo ang sabaw sa yahong tungod sa kakiat ni Julio.

Ang Akong Semanang Talaan(8)

Lunes pa lang, nalumos na ko sa mga buhatunon. Gawas sa akong mga tinugyanan sa eskwelahan, aduna pa mi salo-salo nga giatiman para sa anibersaryo sa Buhilaman Theater Organization(BTO). Paghuman sa among klase, nagpundok dayon mi sa akong mga kauban aron magtiwas sa among mga dibuho ug mamalit og mga pagganti. Alas otso na mi sa gabii nahuman og pamalit dayon nagtiwas gihapon mi og trabaho kay ganahan among magtatambag nga mahuman na namo tanan.

Pagmiyerkules, nisud ko og klase ug sa among Photography class, nagtaho mi sa akong kaabing magtutungha nga si Vera bahin sa Travel Photography. Nahuman mi ug dali-dali ming niadto sa Baseline aron magset-up sa among salo-salo. Naabot ang mga bisita ug nagsugod dayon mi sa among kalingawan.

Kapoy kaayo ko gikan sa salo-salo pero kinahanglan gihapon ko mumata og sayo para sa among Community Involvement(C.I.). Pag-abot nako sa eskwelahan, gipugos nako akong kaugalingon nga maminaw sa sulti bisan og katugon kaayo ko. Pagkahuman niini, nagpundok usab mi sa BTO ug didto namo gihisgut ang mga problema sa grupo dayon nagpraktis mi sa among dula-tula igbiyernes. Gikuyawan ko kay ako ang muarte isip bida ug mao pa ni ang akong pinakaunang pag-apil. Nagpasalamat ko nga dali ra nawagtang ang akong pagkakulba ug nahuman ang among praktis nga malampuson.

Paghuwebes, wala mi nagklase sa duha namo ka subjects sa buntag mao niadto ko sa Lapu-Lapu Police Station aron mukuha ug news blotter alang sa among buhatunon sa Com2. Pagkahuman nako og pakighinabi sa mga pulis, niadto ko sa eskwelahan ug nisulod sa klase unya nagprakits mi balik sa BTO. Alas nuebe na mi nahuman og praktis ug perteng kapoya nako. Pag-abot sa balay, naghimo dayon ko sa akong mga buhatunon sa Com26.

Karong Biyernes, nanan-aw na pud mi og salida sa among klase pagbuntag nga “My Pet.” Usa kini ka Indie film nga nakadaog nga og daghang mga ganti. Giganahan ko sa salida kay nakaigo kini sa akong kasing-kasing. Pagkahuman sa among klase sa Photography, nagpraktis dayon mi sa BTO. Nagsugod ang programa ug amo dayon gipakita ang among dula-tula. Nalipay ko sa gikagawsan sa among gibuhat kay malampuson kini. Busa, nagpasalamat ko og maayo sa Ginoo sa mga talento nga iyang gihatag kanako ug sa akong mga kauban.

Lima Ka Bag-ong Cebuanong Pulong(14)

1. Diwatahan- n. spiritist; psychic; fortune-teller

Gitag-an sa diwatahan nga madato ko sa sulod sa lima ka tuig.

2. Balhas- n. sweat; a salty liquidize substance of the body

Basa kaayo sa balhas si Gemma paghuman niya og sayaw.

3. Kinol- adj. callous; hardened; stiff

Kinol ang mga kamot ni Marco tungod sa sige og panglimpyo sa ilang panimalay.

4. Gutab- v. to knaw; to cut off

Gigutab sa ilaga ang iyang tsinelas.

5. Manabtan- n. a rosary or prayer leader

Gikasab-an sa lalaki ang mga bata kay wala sila naminaw sa manabtan.

Ang Labing Bantugang Sugbuanon Alang Kanako

Ang Akong Semanang Talaan (7)

Dili kaayo bug-at ang akong mga kasinatian karon kon ikompara niaging semana. Malipayon kaayo ko nga wala mi nagklase paglunes tungod sa pagsaulog sa adlaw sa atong Inahang Maria ug pagmartes kay Osmeña Day. Paglunes tibuok adlaw ko natulog kay wala ko’y tarong nga pahuway niadtong niaging semana. Alas kwatro na ko sa hapon nakamata ug naglantaw ra ko og salida paghuman. Martes ko niadto sa among eskwelahan para sa paghimo namo og batakaang balaod sa among debate society. Dugay mi nahuman niini kay daghan kaayo mi og dapat hunahunaon alang ini. Pagkumpleto namo sa among mga buhatunon, niadto ko sa Salon para magpahigalam ug nidiretso ko sa Ayala aron makigsuroy sa akong pamilya paghuman.

Miyerkules mi nipadayon sa among klase og wala ko ganahi niini kay kuwang pa kaayo ang akong pahuway. Apan, wala ko’y mabuhat tungod kinahanglan nako buhaton ang akong mga katungdanan isip usa ka estudyante. Paghuman sa among klase, aduna ko’y giadtuan nga pundok sa among Buhilaman Organization mao nga dugay ko nauli sa among balay.

Paghuwebes nagklase gihapon mi kon diin sa among English7, aduna mi Impromptu Speaking. Ang akong napili nga hilisgutan mao ang pag-gamit og contraceptives ug akong gipasabot sa akong mga kaabing magtutungha nga dili ko muuyon niini. Natagbaw ra pud ko sa akong mga gipang-ingon ug paghuman sa among klase, nag-atiman gihapon mi sa among Buhilaman Organization.

Pagbiyernes, nalipay ko kay gaan-gaan ang among talamdan. Duha ra kabuok among klase apan sa among bakante nga oras, nagbuhat mi sa among sinulat alang sa among dula-tula sa Buhilaman. Nakaginhawa ko sa paghuman namo niini ug nakatulog ko sa akong kahago. Natapos ang among klase ug nikuyog ko sa akong amigo nga nakigsuroy kanako. Pag-abot nako sa among balay, nidiretso ko og himo sa akong mga buhatunon para sa eskwelahan. Gayod, ang kinabuhi isip estudyante dili lalim apan ako nalang gihunahuna nga usa kini ka lingaw nga kasinatian nga importante sa pagpalambo sa akong kaugmaon.

Lima Ka Bag-ong Cebuanong Pulong(13)

1. Yubit- v. despise; to look down upon with disfavor or contempt; scorn

Giyubit sa pamilya Reyes ang ilang mga pobre nga katabang.

2. Subaw- adj. hot; summertime; humid

Gisapot si Julio tungod subaw kaayo ang panahon.

3. Matumotumoon- n. gossip-monger; newsmonger; one who spreads rumors

Maglagot gayod ko sa mga matumotumoon sa among tunghaan.

4. Handuraw- v. to imagine; reminisce; daydream

Naghanduraw si Carla bahin sa iyang mga pangandoy sa kinabuhi.

5. Kiriwan- n. one who steals; hence, kleptomaniac

Among nahibaw-an nga si Ronaldo usa ka kiriwan.

Ang Akong Semanang Talaan(6)

Daghan kaayo og nahitabo sa akong semana karon. Paglunes nagklase ra mi ug paghuman niini, ni-audition ko para sa among VJ Hunt. Ang madaog niato nga indigay mao ang mu-VJ sa Pakiglambigit sa STC. Pagsugod sa among audition, grabe kaayo ang kakulba nga akong nabati apan akong gisuway og hunahuna nga lingaw-lingaw ra to nga kasinatian mao nga dili ko dapat mahadlok. Pagkahuman sa akong kahigayonan nga mu-audition, nalipay ra ko sa akong nabuhat ug sa akong napakita sa mga hukom.

Sa sunod nga adlaw, wala mi nagklase pagbuntag kay saba kaayo ang mga kasaya sa mga estudyante sa pagpangandam sa among Pakiglambigit. Nibalik nalang mi sa among klase paghapon ug pagkahuman niini, aduna mi giadto nga tigum para sa usa sa among pundok. Didto gipahibalo ang mga nadawat sa VJ Hunt ug nalipay kaayo kay usa ko sa mga naapil. Natapos ang among pakighisgot ug niadto mi sa Abellana para sa among praktis sa soccer.

Pagmiyerkules wala mi nagklase apan niadto gihapon mi sa eskwelahan paghapon para sa among run through sa Pakiglambigit. Pag-abot nako sa eskwelahan, luya kaayo akong lawas tungod lain ang akong pamati. Niadto nalang ko sa among Study Hall aron matulog ug nikalit og taas akong hilanat. Ako nalang tong gidala sa pahuway unya nitambong ko sa usa na pud namo ka tigum.

Huwebes nagsugod ang among Pakiglambigit. Niadto mi og sayo sa eskwelahan unya nipraktis dayon mi sa soccer kay kami ang labing una nga muduwa batok sa JEO. Wala jud mi ganahi sa among duwa tungod dili matarong ang ilang pagpitch sa bola kay muuntol-untol kini. Nahibong pud mi nga adunay higayon kon diin nagilis-ilis og hukom ang referee ug nitug-an siya sa iyang sayop paghuman niini apan igo ra siya nangayo og pasaylo ug wala na’y laing gibuhat. Napildi mi sa tulo ka puntos apan maghimo mi og protesta aron aduna’y katarungan sa duwa. Sa tinuoray lang, naglagot jud ko ato ug pati pud ang mga nanambong nakaingon nga dili to matarong ang nahitabo.

Biyernes ang among ikaduhang adlaw sa Pakiglambigit. Nalipay ko pagbuntag kay nakadaog amoang pundok sa volleyball ug badminton. Pagkahapon, nagsugod mi og praktis para sa among duwa sa soccer. Nakuyawan gayud mi tungod ang among kontra usa ka kusgan kaayo nga grupo ug nailhan nga labing isog sa tanan. Nagsugod ang duwa sa among pabor. Nakapuntos mi ug duha, ug pagsulod nila, wala sila nakakuha og puntos. Lipay na unta kaayo mi sa dihang gipahunong ang duwa kay naa daw usa kanamo ang wala nalista ug gipaapil sa duwa. Mao kini ang among designated kicker(DK) ug niingon mi nga nahitabo na sauna ang pagpasulod sa mga DK nga wala sa lista ug gidawat ra sila. Apan niprotesta jud sila ug adunay gubot nga nahitabo ug gihatag ang daog sa among kontra. Sakit kaayo sa among dughan ang nahitabo apan kahibalo mi nga kon buot huna hunaon, kami jud ang tinuod nga nidaog. Mas pilion pa namo ang “mapildi” nga adunay duha ka puntos kay sa sa “madaog” tungod lang sa forfeiture nga wa man lang nakapuntos. Atangan sa tanang tawo ang pamawi sa TCO! Daghang salamat!

Ang Akong Pakighinabi ni Mrs. Glenda Pateña Bahin sa Pagpalambo sa Cebuanong Pinulongan

Lima Ka Bag-ong Cebuanong Pulong (12)

1. Tagaw- adj. uneducated; innocent; ignorant

Gipahimuslan sa among punoan ang mga tagaw nga mga lungsoranan.

2. Yamat- n. an expression of protest, or of doubt

Nagsugod og yamat ang mga magbubuhat batok sa ilang kompanya.

3. Musgot- adj. gloomy; sad; desperate

Luoy tanawn ang musgot nga dagway sa makililimos.

4. Up-op- n. a withering light of a lamp; the dying or fading light of kerosene lamp

Ang up-op nalang ang nagtabang niya sa pagtuon.

5. Kutat- v. to recede; subside; reduce; stop

Nakamata ko sa pagkutat sa bagyo.