Usa Ka Modelong Sugbuanon

“Ikaw ang ehemplo sa imong mga estudyante.”

Mao kini ang mga pulong ni Mrs. Conchita Arriesgado nga nakapatandog og maayo kanako. Bata pa lang si Conchita, nangandoy na jud siya nga mahimog usa ka magtutudlo. Para ka niya, ang pagtudlo usa ka halangdon nga katungdanan kay pinaagi niini, makalambo ka sa kinabuhi sa usa ka bata. Nakuha siya og inspirasyon sa iyang magtutudlo sa ikaupat nga tuig sa high school. Siya ang naghatag og kadasig ni Conchita aron iyang pangusgan ang iyang gusto. Mapasalamaton pud si Conchita nga gihatagan siya og dakong suporta sa iyang mga ginikanan sa iyahang pag-eskwela aron iyang maabot ang iyang ambisyon.

Matod pa ni Conchita, dili sayon ang iyang mga giagian sa paghupot sa iyang pangandoy. Nakaagi siya og daghang pagsulay labi na sa mga intriga sa mga tawo. Aduna’y mga higayon kon diin nakahunahuna siya og hunong apan tungod sa iyang pagsalig sa atong Mahal nga Inahan, nahatagan siya og kadasig nga magpadayon. Nagkuha pud siya og kusog sa iyang pamilya nga pirmi naa sa iyang tupad bisag unsa man ang mahitabo. Niingon si Conchita nga miskin unsa man kalisud ang kinabuhi, kon naa ka’y pagpaninguha, makalampos jud ka niining mga suliran.

Sa pagkab-ot ni Conchita sa iyang ambisyon, nakaingon siya nga nindot kaayo ang pamati nga nakit-an niya ang bunga sa iyang hago. Usa sa iyang labing halandumong kasinatian sa pagtudlo mao ang panahon kon diin niranggo ug 1st place ang seksyon nga iyang gitudloan sa Division Examination. Karon, sobra gihapon ang iyang kalipay nga makit-an ang iyang mga estudyante nga malampuson sa ilang mga panginabuhi. Sa ilang mga katumanan, nakaingon si Cochita nga dili sayop ang iyang gipili nga kurso. Ang pagtudlo jud ang misyon nga gihatag sa Ginoo para kaniya. Miskin wala nadayon ang iyang tinguha nga mahimog madre, wala siya nagbasol kay siya nakapamatuod nga dili lang sa pagmadre siya makapagsilbi sa Ginoo. Bisan og usa ka ka ordinaryong tawo, makabuhat gihapon ka niini sa pagserbisyo nimo sa imong mga kaigsuonan. Alang kay Conchita, makatabang siya sa mga bata nga anak sa Ginoo pamaagi sa pag-amuma isip ikaduhang ginikanan nila.

Niangkon si Conchita nga usa siya ka disciplinarian sa eskwelahan ug sa panimalay. Sa pamaagi niini, nahulma niya ang iyang mga estudyante ug mga anak nga mahimong responsable nga mga tawo. Ang iyang paghatag og disiplina ang nagsugyot kanila nga mubuhat sa ilang mga katungdanan.

Wala naglisod si Conchita sa pagbalanse sa iyang trabaho ug sa iyang pamilya kay matod pa niya, ang pagbalanse naa ra sa tawo. Iyang gisigurado nga parehas ang oras nga iyang gibahin sa duha busa, nakumpleto niya ang iyang trabaho ug wala pud niya napasagdan ang iyang pamilya.

Sa paghisgot ni Conchita bahin sa sistema sa edukasyon sa Pilipinas karon, siya nisulti nga nimaayo kini kompara kaniadto. Sauna, sila pa ang naglihok aron mahuman ang ilang bilding sa eskwelahan nga gitawag nga Barrio High School. Niingon siya nga swerte ta karon tungod sa atong pag-asenso apan nasayod siya nga naa gihapon ta’y mga suliran nga giatubang sa edukasyon. Iyang gihagit ang mga magtutudlo karon nga mulihok ug dili lang mag-agad sa gobyerno. Kinahanglan dili sila maghuwat nga sultian pa kon dili dapat nila buhaton dayon ang ilang mga katungdanan sa katilingban.

Aduna pu’y mensahe si Conchita sa mga batan-on nga nangandoy nga mahimog magtutudlo sama kaniya. Siya niingon nga ang pagtudlo dili sayon nga trabaho apan kon naa kay kadasig ug kalusug, ipadayon kini. Isip magtutudlo, dili ka dapat kanunay magmando sa imong mga estudyante. Kinahanglan nimo ipakita sa ila ang maayong kinaiya, ug sila mismo ang musunod kanimo. Iya pud gibahin ang pinakadakong pagtulon-an nga iyang nakat-unan ug mao kini ang pagsalig sa atong Ginoo.

Sa pagkamatuod nato sa kinabuhi ug sa pagkatao ni Conchita, makaingon ta nga siya, usa gayod ka modelong Cebuano nga kinahanglan natong hatagan og paghatagbili.